Contexta: Äs Biär, nid härgstellt, sondern gmacht

1865 isch di Brasserie Valaisanne zSittu als erschti Brauerie im Kanton Wallis gigründut wordu. Mit ihrusch 10-chöpfigu Team hietu nu chlie und persönlich gfiährt, zeigt schi meh Champfgeischt denn je. Dr Schwiizer Biärmärt durchläbt aktuell än starche Wandl. Dr Trend zu nöi gigründute Brauerie isch ungibrochu und äs git hietu füfmal meh Brauerie als nu vor 10 Jahr. Dische Boom und vor allum dr Vormarsch fa unabhängige Mikrobrauerie sind diräkt mit dr züenähmund Nachfrag na Craft-Biär und dum Trend zu meh Regionalität verbundu. ZWallis biätut derbie beschti Vorüssetzige, fer mit de gwohntu Konventione zbrächu und mit handwärchlich härgstelltu, chraftvolle und charakterstarku Biär di ganz Schwiiz zbigeischtru.

Handwärch mit vill Härz und Lieduschaft

Di Bitonig faner lokal Härkunft liggt zwar uberall im Trend, aber nur will äs Biär üs dum Wallis chunt, is nu lang keis bessers Biär. Und scho gar keis «gicraftuts». In dischum Zämmuhang bitont Hans Joachim Meyer als Markuverantwortliche die üssergwenlich einzigartig wiä öi zietgmässi Wäsunsart fane Walliser: «Ihrusch Härkunft prägt dr Charakter und d’Art, Sache azga. Umgäbu fanera rauu und schroffu Landschaft konzentriärunt schi schich uf zWäsentlicha, süechunt d’Unabhängigkeit und pflegunt äs Maximum an Gselligkeit, Gnuss und Heiterkeit.» Di Schroffheit, dr eigusinnig Charakter und di unbändigi Läbunsfreid spiäglunt schich öi iner Walliser Braukunscht wider. «D’Walliser pflegunt z’ursprünglich Handwärch mit vill Härz und Lieduschaft», so Meyer. Hiä setzt öi di Positioniärig faner Marka und dr nöi Kommunkationsüftritt a. Dr Fokus liggt derbie uf dum Brauhandwärch und mit der dermit verbundunu Haltig: ZBier iner Brasserie Valaisanne wird nid härgstellt, sondern äbu fa Hand und mit vill Härzblüät gmacht. Das bringt der nöi Claim unverblüemt zum Üsdruck: «Wiär mäche Biär».

Nid ei Grund fer äs schlächts Biär

Im Mittlpunkt faner kommunikativu Umsetzig ständ d’einzelnu Biärsorte. Hans Joachim Meyer verwiiest derbi uf d’üffälligu Illustrazione «Mit dum nöiu, jungeru Üftritt wird d’Härkunft üs dum Wallis verstercht bitont und wiär zeige verschieduni Walliser Charaktera wiä zSchwarznasuschaf, dr Walliser Wolf oder di «Tschäggättä», weli dank dum markantu Illustrazionsstil fam Jon Contino fer än handwärchlichi Amüetig und dnötig Üfmerksamkeit sorgt.» Kombiniärt wärdunsch mit der eigunt entworfunu Schrift. «Headlines wiä ‚Endli mal än Stanga, wa nid faner Stanga isch.’ oder ‚Wills nid ei güete Grund git, äs schlächts Biär zbrauu.’ widerspiäglunt dr Humor und dr Stolz fane Walliser», fiährt Meyer wieter üs.

Än Hüch fa Walliser Aprikose

Dr nöi Markuüftritt umfasst näbs de Plakat und dera eigunu Websieta öi diversi Verchöifs- und POS-Materialie. Parallel hett der wältwiit Trend fane Craft-Biär di Brasserie Valaisanne zu zwei nöie Innovatione inspiriärt: ZNöi «Valaisanne Ämrich Weizu» isch äs Weizubiär, wa schies fien fruchtig Aprikosuarmoa nu währund der Hopfig verchunt, uf natürlichum Wäg und ohni künschtlichi Züetate. Di Bizeichnig Ämrich chunt üs dum Walliser Dialäkt und meint di brüehmtu Walliser Aprikose. Di zweit Nöiheit isch das «Valaisanne Pale Ale», äs fruchtig-aromatischus «Single Hop Pale Ale». Insgsamt umfasst zSortimänt füf einzigartigi Biär. Und in jeder Fläscha steckt der individuell und chraftvoll Gschmack, als Üsdruck fam unverwächselbaru Walliser Charakter.

Verantwortlich bi Feldschlösschen Getränke: Hans Joachim Meyer, (Marketingmanager Regionali Marke), Regina Wurz-Janssens (Leiteri Marketing), Nadja Unger (Assistäntin Regionali Marke). Verantwortlichi Agentur: Contexta Wärbeagentur BSW, Bäru. Illustrazione: Jon Contino, New York.

Falls Sie des Walliserdeutschen nicht mächtig sein sollten, finden Sie hier eine deutsche Version des Textes (PDF).